Hun leh nite bei tawh ki zui in, 2011 kum sung , Zomi Innkuan (Singapore) gual zawhna ih ngah man in , ih biak Topa min ih phat hi.
Mimal kim in Topa gamzai na ding leh a bawlsa minam na it man un, khasiangtho in Zomi Innkuan (Singapore) hong om pih in, ei te tawh a ki tuak lo zah dong in, na sephoih, na seppha, na seplimci te matutna, gualzawhna hong pia a hihi. Zomi Innkuan(Singapore) tawh a kal suan khawm mimal kim tung ah Topa’ thu hong pia ta hen.
Kum khat sung tawntung, biak piak kikhopna ki tatsat lo in, ih nei thei hi. Biakpiak kikhopna mun, Foochow Methodist Church te’n Pasian a itna uh tawh phal tak in hong zang sak uh a, inntek te tung leh Topa tung ih lung dam na lian mahmah hi. Biakpiak hungelna, LST sina, Good Friday, Easter Sunday , Bible day, Lungdam bawl zanvak, Lungdam pawi te a hi zong in, Zomi namni, Nute ni, Pate ni, khangnote ni, Nurses day, khuadopawi leh kum thak te a hi zong in, Khangno lam pan ni nga ni sial in Sharing neih theihna,lasin na, lamsina, Zola sina, Singsong service, ZIS lakhumna, video zaihna te a hi zong in, Kimawlna(tukpeng) lam pan in kilawmtatna, CCFS Cup kituhna ah ZIS in Cup ngah gual zawhna, neih leh lam pan in sumpi, nekkhawm sumpi(ci mawh huhna) leh sehsuah sumpi te a kicing ding in thupha hong pia hi.
ZIS’ siate 3 lamsap, biak innsap, lai kung laidal , mission sepna mun 3 ahi, Hlaintaya, Shanchaung, Pattamyaa mun te ah ( ks4200000) hong gual tawh pih hi. Siamasate panpihna ah mimal 30 te tawh kum khat an kuang hong um sak a, Kawlgam Laisiangtho khen kipawlna ah (Ks 2088200) ZIS min tawh ih ki hel zo hi, ZIS in ZYA tawh mapan khopna (Ks 300000), Zogam mencim , cimawh dongtuak panpihna ZIS in sehsuah pan S$ 2000 le mimal panpihna (S$ 2651gawm S$ 4651) ih neih zawhna in, Topa thukim pihna a hih man a hihi.
2010 kum CCJC pawpi pan, hong gah khia a hi, Siapi 5(Big 5) te .(1) Rev.Dr. S. Pau Khan En, (2) Bishop Felex Lian Khen Thang (3) Rev.Dr.Chin Do Kham, (4) Rev.Dr.Do Suan Mung, (5) Rev.Dr. Gin Khan Khual te a ki muh masak na ding un, Singapore gam hong zuan uh a, ZIS in Singapore om, Zomi bup tawh kipawl khawm in nasia tak in mapanna ih nei thei hi. Siapi 5 te thukim na tawh India pan Rev.Dr. JM. Ngul Khan Pau kihel Siapi 6 te in Leitung bup a om, Zomi te’ Pasian mitsuan in kipawl khawm a bucing nuntakna/khantohna ih ngah theih nang, hong makaih ding uh a, kipawlna min ding in 29.04.2011 ni Leitungbup Zomi kipawlna min ding in GZA(Global Zomi Alliance) hong phuan khia ta uhhi. GZA Topa’ thupha hong piak sak ta hen.
GZA Makaipi Rev.Dr.S Pau Khan En te nupa pumpi dam loh na tawh, Singapore zato pi hong zuan uh a, ZIS in cimawhhuhna pan S$500 tawh a hi zong in, mimal kim in, ih hih zawhna bangbang tawh, ih panpih theih man in, ih angtang hi. Topa’ siate nupa khansauna hong piaksak ta hen.
GZA Makai Rev.Dr. JM Ngul Khan Pau te nupa tawh ZIS in hun nuam ih zat theih man in siate nupa tung ih lung dam in, ih ki paak mahmah a, hampha ih ki sa hi. Topa’ci dam in khansauna hong piak sak ta hen.
GZA Makaipi 6 te ii hunzatna te lim tak in video ki la a, a mang ngei nawn lo ding in ki kem hi. Tua ban ah leitungbup mun tuamtuam pan, Zomi te et theih zeuzeu ding in, youtube, facebook , website leh net tuamtuam te ah ki koih in ki khahkhia zo hi. DVD tawh a deih te a ding in, man olno tawh ki hawm khia hi.
Zomi Innkuan (Singapore) ZIS in Global Zomi Alliance (GZA) limliat nuai pan, Topa leh minam a ding , lung sit lo in mawng bang kikawi a,lim bang sung in mabang pangkhawm ciat ni cih tawh a ki zawn ih hihi.2012 kum sung ZIS in, na sephoih, na seppha, na seplimci, a sem zo ding in, Topa hong siam ding ih thungetna a hihi.
Zomi Innkuan (Singapore) ii tup leh ngimna in,
GZA limliap nuai pan,
Mission na sepna bukmun ih kha’n zawh nang,
Siamasate a tam theithei tawh ankuang ih um zawh nang,
ZIS biakpiak kikhopna a tangzai semsem nang,
Zomite a bucing nuntak/khantohna ih ngah nang,
ZYA ”Nasisan tawh hon khia in”na sepna ah a tangzai semsem nang,
Hih tup leh ngimna te a tang tun’ na ding in, upna khaici hoih , khaici manphate lei hoihna ah, a tam theithei ih vawh zawh nang,
Khaici te gahpha in, limci in, an ih lak zawh nang,
Topa’ thupha hong pia kim ciat ta hen.Amen!
Pau Khan Khup
Makaipi
Zomi Innkuan (Singapore)
15.01.2012